Imithetho Yomgwaqo

Imithetho Yokudlula Ezinye Izimoto

Ukudlula

Umshayeli wemoto ohlose ukudlula noma yimuphi omunye umoto ohamba ngendlela efanayo emgwaqweni womphakathi kumele adlule ngakwesokudla sawo ebangeni eliphephile futhi akumele aphinde ashayele ngakwesokunxele sendlela aze adlule ngokuphepha leyo moto ayidlulayo.

Ukweqa umkhawulo wesivinini lapho udlula akuvunyelwe.

Ukudlula ngakwesokunxele kwaleyo moto kuyavunyelwa uma umuntu oshayela imoto edlulayo engakwenza ngokuphepha kuye nakwenye ithrafikhi, futhi:

  • a. imoto edlulwayo iphendukela ngakwesokudla sayo noma umshayeli wayo eveze ukuthi uhlose ukuphendukela ngakwesokudla sakhe,
  • b. lowo mgwaqo ungumgwaqo womphakathi osedolobheni futhi — i. unqunyelwe ezimotweni ezihamba ngandlela-nye, futhi ii. indlela ibanzi ngokwanele kwemigqa emibili noma ngaphezulu yezimoto ezihambayo,
  • c. lowo mgwaqo ungumgwaqo womphakathi osedolobheni futhi indlela ibanzi ngokwanele kwemigqa emibili noma ngaphezulu yezimoto ezihamba kuzo zombili izindlela,
  • d. indlela yalowo mgwaqo inqunyelwe ezimotweni ezihamba ngandlela-nye futhi ihlukaniswe yaba yimizila yethrafikhi ngezimpawu zomgwaqo ezifanele, noma
  • e. ushayela ngokulandela iziqondiso zesikhulu sezomgwaqo.

Ngaphezu kwalokho, akukho ukudlula okumele kwenziwe ngokushayela ehlangothini lwendlela noma emaphethelweni omgwaqo womphakathi.

Umshayeli wemoto akumele adlule enye ithrafikhi ehamba ngendlela efanayo emgwaqweni womphakathi lapho esondela —

  • a. engqungqulwini yommango,
  • b. ejikeni, noma
  • c. kunoma iyiphi enye indawo lapho ukubona kunqunyelwe kangangokuthi ukudlula okunjalo kungadala ingozi kwenye ithrafikhi, engase isondele ivela ngendlela ephambene, ngaphandle uma — i. engakwenza ngaphandle kokungena ohlangothini lwesokudla lwendlela, noma ii. indlela yalowo mgwaqo inqunyelwe ezimotweni ezihamba ngandlela-nye.

Lapho uqaphela enye ithrafikhi ehamba ngendlela efanayo efuna ukudlula imoto yakho —

  • shayela useduze ngangokunokwenzeka nomphetho wesokunxele wendlela, ngaphandle kokuzibeka engozini wena, enye ithrafikhi noma impahla, futhi
  • ungasheshisi isivinini semoto yakho kuze kube enye imoto isidlulile.

Lapho usuzodlula ithrafikhi eza ngakuwe, umshayeli wemoto kumele aqinisekise ukuthi imoto yakhe ayingeni endleleni ngakwesokudla sakhe ngendlela engavimba noma ibeke engozini leyo thrafikhi eza ngakuye.

Umshayeli wemoto ohlose ukudlula ibhasi elimile kumele akwenze ngokucophelela ukuze kuphephe abantu abasondelayo noma abashiya noma abangase basondele noma bashiye lelo bhasi.

Umshayeli wemoto ofuna ukudlula enye imoto ephambili engekho emzileni wesokunxele angayenza umshayeli waleyo moto aqaphele ukuthi uhlose ukudlula ngokunikeza uphawu olubonakalayo ngokuphazimisa izibani zangaphambili zemoto yakhe.

Izimoto kumele zihlale ngakwesokunxele futhi zidlule ngakwesokudla kunoma yimuphi umgwaqo omkhulu.

Imithetho yokudlula ezinye izimoto Imithetho yokudlula ezinye izimoto (umfanekiso wesibili)